കൊടുമുടികള്‍, കാട്, ഹണിപുരാണം(ഇ.എം.കോവൂര്‍)

ഇ.എം.കോവൂർ -ആദ്യ ഭാഗം ഇവിടെ 

കൊടുമുടികള്‍

1968 ല്‍ ആണ് ഈ പുസ്തകം NBS പ്രസിദ്ധീകരിച്ചത്. വക്കീലന്മാരുടെ ലോകത്തിലൂടെയാണ് കഥ നീങ്ങുന്നത്. ഇട്ടിച്ചാണ്ടി വക്കീലാണ് കേന്ദ്രകഥാപാത്രം. കൈയ്യയച്ച് എല്ലാവരേയും സഹായിക്കയും അതു വെളിയില്‍ അറിയരുതെന്ന് വാശി പിടിക്കയും ചെയ്യുന്ന ഇട്ടിച്ചാണ്ടി വക്കീലിനെ ആരാണ് ഇഷ്ടപ്പെടാത്തത്? വിവാഹം, മതം, ജനനം തുടങ്ങി എല്ലാ കാര്യങ്ങളിലുമുള്ള ഇട്ടിച്ചാണ്ടി വക്കീലിന്റെ ചിന്താഗതികള്‍, മനോഗതികള്‍ പലപ്പോഴും എന്റേതു കൂടിയാണെന്നു ഞാന്‍ സന്തോഷത്തോടെ തിരിച്ചറിയുന്നു.

പരസ്പരം യാതൊരു ചേര്‍ച്ചയുമില്ലാത്ത ഭാര്യാഭര്‍ത്താക്കന്മാര്‍, പക്ഷേ ജീവിതകാലം മുഴുവന്‍ പൊട്ടിത്തെറികളില്ലാതെ ഐക്യപ്പെട്ടു ജീവിക്കേണ്ടി വരുന്നു. ആത്മാര്‍ത്ഥവും സ്‌നേഹപൂര്‍ണ്ണവുമായ നിഷ്‌കപട, നിരുപാധിക(unconditional) ചങ്ങാത്തങ്ങളുടെ കൂടെ കഥയാണിത്. തോമസുകുട്ടി-ഇട്ടിച്ചാണ്ടി വക്കീല്‍, അലക്‌സ്-ജേക്കബച്ചന്‍. ഇതു പോലുള്ള ചങ്ങാത്തങ്ങളാണ് എന്നും മനസ്സു കൊതിച്ചിട്ടുള്ളത്.

തേടി വന്ന ഹൈക്കോടതി ജഡ്ജി പദവി വേണ്ടെന്നുഴുതിക്കൊടുത്ത് തീര്‍ത്ഥാടനത്തിനിറങ്ങുന്ന ഇട്ടിച്ചാണ്ടി വക്കിലിനെ വായിച്ചപ്പോള്‍ എന്തുകൊണ്ടോ റോബിന്‍ ശര്‍മ്മയുടെ 'The monk who sold his ferrai' ഓര്‍മ്മ വന്നു. അതിലെ നായകനും മിടുമിടുക്കനായ വക്കീലാണല്ലോ. വക്കീല്‍പണി ഉപേക്ഷിച്ച് ഇന്‍ഡ്യയിലേക്കു വരികയുമാണല്ലോ.

-വിഗ്രഹഭഞ്ജകരും വിപ്ലവമനസ്ഥിതിക്കാരും ഇത്തരക്കാരുടെ(ചോദ്യം ചോദിക്കുന്നവരുടെ) ഇടയില്‍നിന്നുമാണല്ലോ ഉണ്ടാകാറുള്ളത്.

-ഇതു ശരിയാണോ ഇട്ടിച്ചാണ്ടീ!ഒരുത്തന്റെ തെറ്റിന്-ഒരു മഠയത്തരത്തിന്-യാതൊരു തെറ്റും ചെയ്യാത്തവന്‍ ശക്ഷ അനുഭവിക്ക, കഷ്ടപ്പെടുക.,ഇതു ശരിയാണോ ഇട്ടിച്ചാണ്ടീ?(തോമസുകുട്ടി)-രണ്ടുപേര്‍ക്കും അപ്പോള്‍ 14 വയസ്സു പ്രായം.

അവനറിഞ്ഞിരുന്നില്ല, അവനേക്കാള്‍ നാലും ആറും ഇരട്ടി വയസ്സുല്ലവരേയും കൂടി കറക്കിയിട്ടുള്ള ഒരു ചോദ്യമായിരുന്നു ഇതെന്ന്..മറുപിയായി ചിലര്‍ ഞഞ്ഞാമിഞ്ഞാ പറകയോ തോല്‍വി സമ്മതിക്കയോ ചെയ്യാറുള്ള ഒരു ചോദ്യമാണിതെന്ന്. 'അണ്‍മെറിറ്റഡ് പണിഷ്‌മെന്റ്(അര്‍ഹിക്കാത്ത ശിക്ഷാനുഭവം  '   'വിക്കേറിയസ് സഫറിംഗ് ്(അന്യര്‍ക്കു വേണ്ടി അനുഭവിക്കുന്ന പീഡനം) ' എന്നെല്ലാമാണ് വേദശാസ്തരജ്ഞന്മാരും ദാര്‍ശനികരും ഈ പന്തികേടിന് പേരുകള്‍ നല്‍കിയിട്ടുള്ളതെന്ന് അവനറിഞ്ഞുകൂടായിരുന്നു........അതുകൊണ്ട് ബുദ്ധിമാനായ ആ ബാലനും പല മതപണ്ഡിതരേയും ധാര്‍ശനികരേയും അനുകരിച്ച് മിണ്ടാണ്ടങ്ങിരുന്നു കളഞ്ഞു.

-സ്ത്രീഹൃദയം കുറേയധികം പഠിച്ചിട്ടുള്ളവനായിരുന്നു തണ്ടാന്‍ കരുണാകരന്‍. ഏതു സാക്ഷായും ഏതു സ്ത്രീ ഹൃദയവും മൃദുലമായ കൈപ്പെരുമാറ്റത്തിന് അവസാനം വഴങ്ങുമെന്നുള്ളതാണല്ലോ അലക്‌സാണ്ടര്‍ ഡൂമാ പറഞ്ഞിട്ടുള്ള മനശ്ശാസ്ത്രതത്വം........പണ്ടുമുതലേ ആണുങ്ങളങ്ങനൊക്കെയാണ്.കാര്യം കാണാന്‍ അവര്‍ പലതും പറകയും കാട്ടുകയും ഒക്കെ ചെയ്യും. പക്ഷേ പെണ്ണുങ്ങള്‍ വേണം കണ്ടും കേട്ടും ഒക്കെ നില്‍ക്കുവാന്‍.ഇതായിരുന്നു(ആ പാവം പെണ്ണിനെതിരെ) കരയിലെ പെണ്ണുങ്ങളുടെ വാദം.......വ്യഭിചാരിണി!കണ്ടമാനക്കാരി!പിന്നെ കൊലപാതകിയും!പക്ഷേ ഇതിനെല്ലാം കാരണക്കാരനായ തണ്ടാന്‍ കരുണാകരന്‍ ഈ കാലങ്ങളിലെല്ലാം ഒരു വലിയ തലേക്കെട്ടുമായി, ചൂളവുമൂതി നടക്കയായിരുന്നു.പുതുവയലുകള്‍ തേടി.

-തോമസ് ഹാര്‍ഡി പറയുമ്പോലെ നീതിയുടെ സംരക്ഷണം ഏറ്റെടുത്തിട്ടുള്ള ദേവസംഘത്തിന്റെ മഹാപ്രസിഡന്റിനു തൃപ്തിയുമായി!

-സംഖ്യയില്‍ ചെറുതെങ്കിലും കേരളത്തില്‍ കുറേ ക്രൈസ്തവ കുടുംബങ്ങള്‍ ഉണ്ട്.......ദൈവം എന്നാല്‍ തങ്ങളാല്‍ നേരേയാക്കാന്‍ വയ്യാത്ത വിധം കാര്യങ്ങള്‍ കുഴപ്പത്തിലാകുമ്പോള്‍ സഹായത്തിന് അര്‍ദ്ധമനസ്സോടെ തിരിയാനുള്ള ഒരു രക്ഷാപുരുഷന്‍, എന്നിങ്ങനെയുള്ള അവ്യക്തധാരണകളിലും ചിനതകളിലും മതത്തെ ഒതുക്കി നിര്‍ത്താന്‍ കൂട്ടാക്കാത്ത കുറേ ആളുകള്‍.....തങ്ങളുടെ മുമ്പിലിരിക്കുന്ന ഒരു വ്യക്തിയാക്കാളോ പദാര്‍ത്ഥത്തത്തെക്കാളോ യാഥാര്‍ത്ഥ്യമാണ് അവര്‍ക്കു ദൈവം.തൊട്ടടുത്തുള്ള ഒരു മഹല്‍ വ്യക്തിയുമായി മുഖാമുഖം നടത്തുന്ന ദൈനംദിന സംഭാഷണമാണ് അവര്‍ക്കു പ്രാര്‍ത്ഥന.

-മനുഷ്യസേവനത്തില്‍ നിന്നും ലഭിക്കുന്ന ആനന്ദത്തിന്റേയും സംതൃപ്തിയുടേയും രുചിയും ലഹരിയും അവനിപ്പോഴേക്ക് ശരിക്ക് അറിഞ്ഞുകഴിഞ്ഞിരുന്നു.(ജേക്കബ് വറുഗീസ് പിന്നെ പട്ടം കിട്ടി ജേക്കബ് അച്ചന്‍)

--അപ്പന്‍ തന്റെ തല മോളില്‍ മേഘങ്ങളുടെ ഇടയിലാണ് സൂക്ഷിക്കുന്നതെങ്കില്‍, അമ്മ തന്റെ ഇരുകാലുകളും ഭൂമിയില്‍ നല്ലവണ്ണം ഉറപ്പിച്ചാണ് നടക്കുക!(ഇട്ടിച്ചാണ്ടി തന്റെ അപ്പനമ്മമാരായ പോത്തന്‍ ഉപദേശിയേയും കുഞ്ഞാണ്ടമ്മയേയും കുറിച്ച്)

-സെക്‌സിനെപ്പറ്റി തനിക്കറിയാം. മനുഷ്യരിലും മറ്റു ജീവജാലങ്ങളിലും പ്രവര്‍ത്തിക്കുന്നഏറ്റവും പ്രബലമായ ഒരു വാസനയോ ശക്തിയോ ആണതെന്ന്.ഢാര്‍വ്വിനും ഹക്‌സലിയും ഹാവ്‌ലോക് എല്ലീസുമെല്ലാം അതേ കുറിച്ച് എഴുതിയിട്ടുണ്ട്. പക്ഷേ, എന്തുകൊണ്ടോ, അങ്ങനെ ഒരു ശക്തി ഈ ഭൂമുഖത്തേയില്ല എന്നങ്ങു ഭാവച്ചു ജീവിക്കുന്ന ഒരു സമുദാത്തിലാണ് തന്റെ ജനനനവും വളര്‍ച്ചയും...........വേദപുസ്തകത്തില്‍ വായിച്ചിട്ടുണ്ട്.പക്ഷേ അതെല്ലാം വളരെ പൊതിഞ്ഞ ഭാഷയിലായിരുന്നു.അതുപോലെ ദാവീദു രാജാവ് പണ്ട് ആരുടേയോ ഭാര്യയെ തട്ടിയെടുക്കുവാന്‍ ആ പാവ്പപെട്ടവനെ സൂത്രത്തില്‍ കൊല്ലിച്ചു എന്നും കേട്ടിട്ടുണ്ട്. മഗ്ദലനക്കരാി മറയം ചെറുപ്പത്തിലേ കുഴപ്പക്കാരിയയാിരുന്നുവെന്നു കേട്ടിട്ടുണ്ട്......പരസംഗം, വ്യഭിചാരം, കണ്‍മോഹം, ജഡമോഹം, ജഡേച്ഛ എന്നെല്ലാമുള്ള കടുത്ത വാക്കുകള്‍ ഉപയോഗിച്ച് കാര്യങ്ങള്‍ അവ്യക്തമാക്കും.കുട്ടികള്‍പ്പോല്‍ യാതൊരു പിടിയും കിട്ടുകയുമില്ല.(വേദപാഠക്ലാസിനെ പറ്റി)

-കുറേക്കൂടി പ്രായമായപ്പോള്‍ അവന്‍ വേറൊരു കാര്യം സൂക്ഷിച്ചു.ഹിന്ദുക്കളായ തന്റെ സതീര്‍ത്ഥ്യര്‍ സെക്‌സ് എന്ന വിഷയം കൂടുതല്‍ സ്വാതന്ത്രയബുദ്ധിയോടെയും തുറന്നുമാണ് കൈകാര്യം ചെയ്തിരുന്നതെന്ന്. അവരുടെ മതവും പുരാണങ്ങളും സെക്‌സിനെ സ്വാഭാവികമായും യാഥാര്‍ത്ഥ്യബോധത്തോടെയുമാണ് വ്വഹരിച്ചിരുന്നതെന്ന്.യാതൊരു കാപട്യവും അവരിക്കാര്യത്തില്‍ കാട്ടാറില്ലായിരുന്നുവെന്ന്.....അവര്‍ക്കു യാതൊരു വല്ലായ്മയും ലജ്ജും ഇല്ലായിരുന്നുവെന്നും,ജയദേവന്റെ ഗീതാഗോവിന്ദം അവര്‍ ദിവസേനം വീടുകളില്‍ പാടാറുണ്ടായിരുന്നെന്നും.

-ഇതോടൊപ്പം അവന്‍ വേറൊരു യാഥാര്‍ത്ഥ്വവും കൂടി ഗ്രഹിച്ചു.തന്റെ സമുദായക്കാര്‍ സെക്‌സിനെപ്പറ്റി ഊമത്വം നടിച്ചിരുന്നെങ്കിലും മറ്റാരേയും പോലെ അവരും അതിന്റെ പ്രബലമാസ്മരശക്തിക്ക് വശംവദരും വിധേയരും ആയിരുന്നെന്ന്.അപ്രമേയഭാവത്തോടെ അവരുടെ ഇടയിലും, വിവാഹവേലിക്കകത്തും പുറത്തും, വിരാജിച്ചിരുന്നെന്ന്.

-തീയ്ക്കടുത്ത് പോയി കളിച്ച് കൈ പൊള്ളുകയില്ലെന്ന് ഉറപ്പുണ്ടെങ്കില്‍ പോയി കളിച്ചോളൂ.(ഇട്ടിച്ചാണ്ടിയോട് നാഗന്‍പിള്ള എന്ന സ്‌നേഹധനനന്‍ ഗുമസ്തന്‍)

-അന്തസ്സില്ലാത്ത ഒരു വക്കീലും അന്തസ്സില്ലാത്ത ഒരു സ്ത്രീയും ഒരു പോലെയാണ്.ഇരുവരും കണ്ണിനും ഹൃദയത്തിനും വേഗത്തില്‍ വെറുപ്പു നല്‍കും.(അവിടേം കംപാരിസണ്‍ സ്ത്രീയുമായി ആണ്.:))

-വരാനുള്ള ലോകത്തിലെ കാര്യങ്ങള്‍ പറയുകയും പഠിപ്പിക്കുന്നതിനു മുമ്പായി, വന്നു കഴിഞ്ഞ ലോകത്തിലെ കാര്യങ്ങള്‍ ചെയ്യുകയും പഠിപ്പിക്കുകയുമാണ് കൂടുതല്‍ ആവശ്‌മെന്ന് ആ പുരോഹിതനു(ജേക്കബ് അച്ചന്‍) വേഗം  ബോദ്ധ്യമായി.

-ഉപ്പും കുരുമുളകും ചേര്‍ക്കാതെ മുട്ട കഴിക്കുമ്പോലെയുള്ള തോന്നല്‍.(കുഞ്ഞാണ്ടമ്മയുടെ അസ്വശ്ഥതയെ കുറിച്ച്)

-വിവാഹജീവിതത്തില്‍ ഒരേ തരം അനുഭവവങ്ങളും പിരിമുറുക്കങ്ങളും അപ്പോള്‍ പലര്‍ക്കും ഉണ്ടാകാം!ഇവയെല്ലാം ദൈവത്തെ ഭയന്നോ മനുഷ്യരെ ശങ്കിച്ചോ, കുട്ടികളുടെ ഭാവിയെപ്പറ്റി കരുതിയോ അപ്പോള്‍ ആരെയുമാരെയുമറിയിക്കാതെ എല്ലാവരുമങ്ങു സഹിക്കയാണ്;വിഴുങ്ങുകയാണ്!.......രക്ഷയില്ല, യാതൊരു രക്ഷയുമില്ല.ഒറ്റാലില്‍ പെട്ട മീനിന്റേയോ കെണിയില്‍ പെട്ട എലിയുടേയോ അവസ്ഥയാണു മനുഷ്യരുടേത്. ഈ ഒറ്റാലിലേക്കും കെണിയിലേക്കും തങ്ങളെ കടത്തി വിടണമെന്ന് വല്ലോരും ആവശ്യപ്പെട്ടുവോ! അങ്ങനെ ചെയ്യുന്നതിനു മുമ്പായി, അല്ല, ഈ ലോകത്തിലേക്കു തന്നെ പിടിച്ചുവലിച്ചുകൊണ്ടുവരുന്നതിനു മുമ്പായി, തങ്ങളോടൊരു വാക്കു തന്നെ പറഞ്ഞുവോ!ചോദിച്ചുവോ !

-വാര്‍ദ്ധക്യത്തിന് ഒരു ഗുണവിശേഷമുണ്ട്-ഒരുവനിലെ സാത്വികഭാവത്തേയോ തമസ്സിനേയോ കടുത്ത ചായങ്ങളില്‍ മുഖത്തു പ്രകാശിപ്പിക്കുവാന്‍....

കാട് 

ഈ നോവല്‍ ആദ്യം പ്രസിദ്ധീകരിച്ചത്, 1964 ലാണ്, എന്‍.ബി.എസ് . ഇപ്പോഴും അവര്‍ തന്നെ എന്ന് നെറ്റില്‍ കാണുന്നു.

ഇതിലെ മുഖവുരയും വളരെ ആസ്വാദ്യകരം, വിജ്ഞാനപ്രദം. മുഖവുരയില്‍ സൂചിപ്പിക്കുന്നതു പോലെ പണവും പണക്കാരും ,യെര്‍ മാര്‍ക്കറ്റടക്കമുള്ള ബിഗ് ബിസിനസ്സും  ചേര്‍ന്ന കാടാണ് ഈ നോവലിന്റെ പ്രതിപാദ്യ വിഷയം. പ്ലാന്റര്‍ കൊച്ചപ്പനാണ് ഇതിലെ നായകന്‍ എന്നു പറയാം. ത്യാഗരാജകീര്‍ത്തനം പഠിച്ച, പാടാന്‍ കഴിവുള്ള ശോശാമ്മ-കൊച്ചപ്പന്റെ ഭാര്യ- ഇതിലെ മുഴുനീള നിശബ്ദ വേദനയാണ്.

'ആത്യന്തികവിശകലനത്തില്‍ ഒരു നോവലിസ്റ്റിനു തന്റെ സൃഷ്ടികര്‍മ്മം നിര്‍വ്വഹിക്കുവാനുള്ള പ്രധാന ഉപാധിയും ഉപകരണങ്ങളും കുറേ കഥാപാത്രങ്ങള്‍ മാത്രമല്ല.  '-മുഖവുരയില്‍ നിന്ന്.

-ഒരു നിഴലിന്റെ അനായാസതയോടെ മൈക്കലവിടെ നിന്നും ഉടനേ അപ്രത്യക്ഷനായി.

-വേമ്പുവയ്യന്‍ മന്ത്രവാദിയുടെ തൊപ്പിയിലെ മുയലിനെ പോലെ പെട്ടെന്ന് അവിടെ നിന്നും അപ്രത്യക്ഷനായി.

-ഉത്കണ്ഠയും ജിജ്ഞാസയും കൊണ്ട് (കൊച്ചപ്പന്റെ) ഹൃദയം നിറഞ്ഞു. പക്ഷേ അതൊന്നും ആ മുഖത്തോ, തന്റെ വാക്കുകളിലോ നിഴലിച്ചില്ല. അനേകകാലത്ത സാധനയുടെ ഫലമായി ഒരു ബിസിനസ്സ് മാന്‍ വളര്‍ത്തിയെടുക്കുന്ന ഒരു വലിയ കഴിവാണത്. ഒരു നിറച്ച ഉപ്പുചാക്കിന്റെ വികാരശൂന്യതോടെയാണ് അപ്പറഞ്ഞതെല്ലാം താന്‍ കേട്ടുകൊണ്ടിരിക്കുന്നതെന്നു കൊച്ചപ്പന്‍ തോന്നിപ്പിച്ചു.

-ഫ്‌ളെച്ചറെപ്പോലുള്ള വെള്ളക്കാര്‍, 'മി.കൊച്ചാപ്പന്‍, മിസ്സിസ്.കൊച്ചാപ്പന്‍........വിസിറ്റ് ' എന്നെല്ലാം പറയുന്നതു കേട്ടാല്‍ ഇവന്മാരും ഇവനും ഇവന്റെയൊക്കെ  തന്തമാരും ആയിരുന്നോ കുറേ വര്‍ഷങ്ങള്‍ക്കു മുമ്പ് നാട്ടുകാരെ, 'ബ്ലഡി നിഗ്ഗേഴ്‌സ്' എന്നും  'ബ്ലഗാര്‍ഡ്‌സ് ' എന്നും  'ബ്ലൂമിങ് ബാസ്റ്റാര്‍ഡ്‌സ്  ' എന്നും എല്ലാമുള്ള ഓമനപ്പേരുകള്‍ വിളിച്ചിരുന്നതെന്നു സംശയിച്ചു പോകും.

-എന്തോന്നാ ഈ സാംസ്‌കാരമെന്നീ മനുഷ്യരെല്ലം പറകയും പ്രസംഗിക്കയും ചെയ്യുന്നത്?താമസിക്കാന്‍ നല്ല ഒരു ബംഗ്ലാവ്, കേറി നടക്കാന്‍ വലിയ ഒരു കാറ്, തോന്നുമ്പോഴെല്ലാം നല്ലനല്ല വസ്ത്രങ്ങള്‍ ധരിക്കാനുള്ള സൗകര്യം, നല്ല തീറ്റ, സ്ഥലത്തെ പ്രധാനപ്പെട്ട എല്ലാ 'ഫങ്ഷണു'കളിലേക്കും ക്ഷണം-ഇവയെല്ലാമല്ലാതെയെന്താണീ സംസ്‌കാരമെന്നു പറയുന്നത്?(പഌന്റര്‍ കൊച്ചപ്പന്റെ മനോഗതങ്ങള്‍)

സുറിയാനി കൃസ്ത്യാനികളള്‍ എന്ന വിചിത്ര ജീവികളെ പറ്റി കൊച്ചാപ്പന്റെ ബിസിനസ് പങ്കാളിയും ബുദ്ധികൊണ്ടു കുറുക്കനുമായ മാമ്മച്ചന്‍ നര്‍മ്മരസം കലര്‍ത്തി വിവരിക്കുന്നുണ്ട്. വിസ്തരഭയത്താല്‍ അതിവിടെ മുഴുവന്‍ എഴുതുന്നില്ല.

-.........പള്ളിയോടടുത്തു തന്നെ ബാങ്കും. ചാപ്പലിനോടടുത്തു തന്നെ ലിക്കര്‍ ഷാപ്പും ഞങ്ങള്‍ നടത്തും! പറയുന്നതിലെല്ലാം വേദവാക്യങ്ങള്‍ മോമ്പൊടി പോലെ തൂവിയിരിക്കും. പക്ഷേ ഞങ്ങളുടെ കണ്ണ് ബാങ്ക് ബാലന്‍സുകളിലും ഡിവിഡന്റുകളിലുമായിരിക്കും.!

-തനിക്കു വേണ്ടി മുന്‍കൂട്ടി ആലോചിക്കയും കരുതുകയും ചെയ്യുന്ന ഒരു പുരുഷനുണ്ടായിരിക്കുക-ഒരു സ്ത്രീയുടെ സ്വപ്‌നങ്ങളുടെ കാതലാണത്

-ചിലര്‍ക്കു നല്ല ഭൂമി കാണുമ്പോള്‍ ഒരു തരം പൂതിയാണ്. മീനച്ചില്‍ തൊടുപുഴത്താലൂക്കുകാര്‍ അക്കൂട്ടരുടെ മുമ്പില്‍ നില്‍ക്കും.

-പത്തോ നൂറോ മഴക്കാലങ്ങള്‍ക്കുളള ഭക്ഷണവിഭവങ്ങള്‍ സമ്പാദിച്ചു കഴിഞ്ഞാലും അവയടിങ്ങിയിരിക്കയില്ല. പി്‌നനെയും അദ്ധ്വാനിച്ചുകൊണ്ടേയിരിക്കും.അദ്ധ്വാനിച്ചില്ലെങ്കില്‍ അവരില്ല.(ഉറുമ്പുകളെ പറ്റി)....കൊച്ചപ്പനും അയാളെപ്പോലുള്ളവരും ഈ ഉറുമ്പുകളെ പോലെയാണ്. സമ്പാദിക്കണം. വേണ്ടിവന്നാല്‍ പട്ടിണി കിടന്നും ദുഷ്ടതകള്‍ കാട്ടിക്കൂടിയും സമ്പാദിക്കണം. എന്തിനെന്നും എത്ര കാലത്തേക്കെന്നും ഒന്നും ചോദിച്ചക്കരുത്.

-വാസ്തവത്തില്‍ കൊച്ചപ്പനും പാപ്പച്ചനും(അപ്പനും മൂത്ത മകനും) തമ്മിലുള്ള സംഘട്ടനങ്ങള്‍ രണ്ടു വ്യക്തികള്‍ തമ്മിലുള്ളവ സംഘട്ടനങ്ങള്‍ ആയിരുന്നില്ല, രണ്ടു തരം വിലയിരുത്തലുകള്‍ തമ്മിലോ തത്വസംഹിതകള്‍ തമ്മിലോ തലമുറകള്‍ തമ്മിലോ ഉള്ള സംഘട്ടനങ്ങളായിരുന്നു.

-എടാ ഈ ബിസിനസ്സ് എന്നു പറയുന്നത് കടുവായും കരടിയും കാട്ടുപോത്തും കുറുക്കനുമെല്ലാമുള്ള ഒരു നല്ല കാടാണെന്നോര്‍ത്തോ. എപ്പോഴും കണ്ണിലെണ്ണയുമൊഴിച്ചിരുന്നോളണം......ബലമില്ലാത്തവനെ, ഉപായങ്ങളറിയാത്തവനെ ,കൊല്ലാന്‍ തയ്യാറില്ലാത്തവനെ,കൊന്നു കൊല വിളിക്കുന്ന വെറും കാടാാ അത്... (കൊച്ചപ്പന്‍ മകന്‍ പാപ്പച്ചനോട്)

കൊച്ചപ്പന്‍ അനിയന്‍കുഞ്ഞിനോട് കല്യാണക്കാര്യം അവതരിപ്പിക്കുന്നതില്‍ നിന്ന് ചിലത് താഴെ

-തൊടങ്ങുമ്പം ഈ മുതലാളി മുതലാളിയെന്നുള്ള വെറും പേരേ ഉണ്ടായിരുന്നുള്ളു. നമ്മളു ചിലരെ തിരുമേനി തിരുമേനിയെന്നു വിളിക്കുമ്പോലെ.
-അത്തരം ഉറച്ച കുടുംബക്കാരുമായി ഇങ്ങനെത്തെ രണ്ടോ മൂന്നോ ബന്ധുതകളുണ്ടാകുമ്പം നമ്മളുമങ്ങു താനേ കുടുംബക്കാരാകും.

-ബന്ധുക്കാരും ബന്ധുത്വവുമൊക്കെ വെറും കൊടിച്ചിപ്പട്ടികളാ അനിയന്‍കുഞ്ഞേ. പണമുള്ളവന്റെ പുറകേ അവറ്റ വാലും താഴ്ത്തിയോടിയെത്തിക്കോളും തൊഴിച്ചു മാറ്റിയാലും പോകില്ല. (കൊച്ചപ്പന്‍ തന്റെ ഇളയ മകനും ആദര്‍ശവാദിയുമായ അനിയന്‍കുഞ്ഞിനോട്. ഈ മകനാണ് അമ്മയുടെ താങ്ങും തണലും.)

-ഒരു പത്രം നല്ല ഒരു തോട്ടി പോലെയാ. വശമുള്ളവനതുകൊണ്ടു പല പഴോം വലിച്ചു താഴെയിടാം.(മാമ്മച്ചന്‍ കൊച്ചപ്പനെ പത്രം തുടങ്ങുവാന്‍ പ്രേരിപ്പിക്കുമ്പോള്‍)....ഭരിക്കുന്നോര്‍ക്കു വല്ലോരേം പേടിയൊണ്ടെങ്കി അതീ പത്രക്കാരെ മാത്രമാ..

-കാറോടിക്കാനറിയാത്തവന്‍ കാറേ കേറി നടക്കുന്നില്ല?തെങ്ങേക്കേറാനറിയാത്തവര്‍ തേങ്ങാ തിന്നുന്നില്ലേ?....നമ്മളു പറയുന്നപോലെ എഴുതിത്തരാന്‍ കഴിവുള്ള മിടുമിടുക്കരെ നൂറു കണക്കിലീ നാട്ടില്‍ കിട്ടും......(അങ്ങനെ മാമ്മച്ചന്റെ വാഗ്വിലാസത്തില്‍ കൊ്ച്ചപ്പന്‍ വീണു, പത്രവും അങ്ങു തുടങ്ങി..)

-മാനിനെ കൊല്ലുന്നത് പുള്ളി്പപുലിക്കു ഗുണമായിരിക്കും.പക്ഷേ അതാ മാനിനും മുയലിനുമുള്‍പ്പടെ നാട്ടിലെ എല്ലാ ജന്തുക്കള്‍ക്കു ംഗുണകരമാണെന്നു പറഞ്ഞാല്‍ അതു മനസ്സിലാക്കാനെനിക്കു ബുദ്ധിമുട്ടുണ്ട്.-(വിഷയം പത്രം തന്നെ-അനിയന്‍കുഞ്ഞ് അപ്പനോട്.)

-പുരുഷനെത്ര മരങ്ങോടനായാലും തരക്കേടില്ല, അവന്റെ കഴുത്തില്‍ തൂങ്ങുക. ഇന്നു നൂറു നൂറു വഴികളാണ് പെണ്ണുങ്ങള്‍ക്കു തുറന്നു കിട്ടിയിട്ടുള്ളത്. സ്വാതന്ത്യം ലഭിച്ച സ്ത്രീക്കു വിവാഹം ആവശ്യമില്ല എന്നു ഞാന്‍ പറകില്ല. പക്ഷേ പശുവിന്‌റെ കയറു മാറുന്ന പോലുള്ള  പഴയകാലത്തെ രീതിയൊന്നു മാറാതെ തരമില്ല.പണമുണ്ടെന്നുള്ള ഒറ്റക്കാരണം കൊണ്ട് ഓരോരുത്തന് ഏതൊരു പെണ്ണിനേയും കെട്ടാമെന്നുള്ള സമ്പ്രദായം ഒന്നു മാറിയേ തീരൂ.(വന്ദ്യനായ പീലിപ്പോസു മാസ്റ്റര്‍ അനിയന്‍കുഞ്ഞിനോടും ഭാര്യയോടും)

-ധനം വലിച്ചുകൂട്ടുന്നതില്‍ യാതൊരു രസവും കണ്ടെത്താത്ത അപൂര്‍വ്വം ചില വ്യക്തികളില്‍ ഒരാളായിരുന്നു പിലിപ്പോസു മാസ്റ്റര്‍.

-കൊല്ലുന്നതിനു മുമ്പ് ചിരിച്ചുകാട്ടിക്കോളണം.പറയുന്നതിനെല്ലാം പഴുതുകളിട്ടേ പറയാവൂ.

-സാമ്പത്തികമായി ഉയരാനുള്ള ആഗ്രഹം ചില മനുഷ്യരിലില്ല....വെള്ളക്കാര്‍ക്കതുണ്ട, ഗുജറാത്തികള്‍ക്കതുണ്ട്. അതുകൊണ്ടാണവര്‍ ലോകത്തിന്റെ നാനാഭാഗത്തുമെത്തി എസ്‌റ്റേറ്റുകള്‍ ഉണ്ടാക്കുന്നതും കച്ചവടം നടത്തുന്നതും സാമ്രാജ്യങ്ങള്‍ സ്ഥാപിക്കുന്നതും. വേണ്ടി വന്നാല്‍ ഇവയെല്ലാം സ്ഥാപിച്ചെടുക്കാന്‍ യുദ്ധങ്ങള്‍ക്കുകൂടെയും ഇറങ്ങിപ്പുറപ്പെടുന്നതും.നമ്മുടെ നാട്ടുകാരില്‍ ഭുരിപക്ഷത്തിനും ആ ഇച്ഛാശക്തിയില്ല.    

-നരിയും കുഞ്ഞായിരിക്കുമ്പം പൂച്ചക്കുഞ്ഞിനെപ്പോലിരിക്കും വളരുമ്പം കാണാം പല്ലും നഖവും നീണ്ടു നീണ്ടു വരുന്നത്.

-എന്റെ അച്ഛന്‍ എന്നെ ഒരു കാര്യം പഠിപ്പിച്ചിട്ടുണ്ട്. ഒരു ഉദ്യോഗസ്ഥനെന്ന നിലയില്‍ ആരോടും ഒന്നിനോടും കടപ്പെടുവാന്‍ ഇടയാകരുതെന്ന്.....ഐപിഎസുകാരനായ ഭുവരാഹന്‍ പറയുന്നത്.

-കോണ്‍ഗ്രസ്സുകാരുടെ എല്ലാ ആലോചനകളിലും അയാള്‍ക്ക്,പത്രേകിച്ച് അയാളുടെ മണിപേഴ്‌സിന് മികച്ച സ്ഥാനമുണ്ടായിരുന്നു.

-സാത്താനേയും എന്തിനാടാ ആവശ്യമില്ലാതെ പിണക്കുന്നത്?അവനെക്കൊണ്ടും നാളെ ആവശ്യം വരില്ലെന്നാരു കണ്ടു?

-അമ്മമാര്‍ ഹൃദയം കൊണ്ടാണല്ലോ എല്ലാക്കാലവും മക്കളെ മനസ്സിലാക്കുന്നത്.

-ഒറ്റപ്പാളത്തിലോടുന്ന തീവണ്ടി കണക്കാണ് കൊച്ചപ്പന്റെ ബുദ്ധി.ഒരാശയം അതിനുള്ളില്‍ കടന്നാല്‍ പിന്നെ ഇടത്തോട്ടോ വലത്തോട്ടോ തിരിയാതെ നേരേ അതൊരൊറ്റ ഓട്ടമാണ്.

-സുഖക്കേടിനെ അവഗണിച്ചാല്‍ അതു ദേഷ്യപ്പെട്ടോ നാണിച്ചോ അങ്ങോടിപ്പൊയ്‌ക്കൊള്ളുമെന്നായിരുന്നു അയാളുടെ ഭാവം.

-മനുഷേരുടെ ആശ ഉപ്പുവെളളം കുടിക്കുമ്പോലെയാ. കുറച്ചു കുടിക്കുമ്പം പി്‌ന്നേം കുടിക്കണം. ദാഹം തീരത്തില്ല.

-ഇതൊന്നും നന്നാവില്ല, നന്നാക്കാന്‍ നോക്കയും വേണ്ട എന്നും പറഞ്ഞു കയ്യും കെട്ടി കളിസ്ഥലം വിടുന്നവന്‍ ഭീരുവാണ്.

-വിളമ്പിയ കറിയിലെ കറിവേപ്പില മാറ്റി വയ്ക്കുമ്പോള്‍ ആ ഇല നീരസപ്പെടുന്നുണ്ടോ ഇല്ലയോ എന്ന് ആരാണു നോക്കാറുള്ളത്.

-യഥാര്‍ത്ഥത്തില്‍ കാലവും കുട്ടികളും കൂടെയായിരുന്നു ആ വ്യത്യാസങ്ങളെല്ലാം ആ വീട്ടില്‍ വരുത്തിയിരുന്നത്. കൂടെ സ്‌നേഹവും, ദീര്‍ഘക്ഷമയും,ബുദ്ധിയും നിറഞ്ഞ ഒരു പെണ്‍കുട്ടി നിശബ്ദമായി സൃഷ്ടിച്ച അന്തരീക്ഷവും.

-കാലത്തിനും സ്‌നേഹത്തിനും നന്മയ്ക്കും നേടുവാന്‍ കഴിയാത്തതൊന്നും ഈ ലോകത്തില്‍ ഇല്ലെന്നു വിശ്വസിക്കുക

ഹണിപുരാണം-രണ്ടു ഭാഗങ്ങള്‍.

1961 ലാണ് ഇത് ആദ്യം പ്രസിദ്ധീകരിച്ചത്. എസ്.പി.സി.എസ്. ധാരാളം ശമ്പളം പറ്റുന്ന വലിയ പദവിയിലുള്ള ഭര്‍ത്താക്കന്മാര്‍ക്കൊപ്പം മദിരാശി നഗരത്തിലേക്കു പറിച്ചു നടപ്പെട്ട കേരളത്തിലെ നാലു കുഗ്രാമവാസിനികളുടേയും അവര്‍ അവിടെ സൊസൈറ്റി ലേഡീസ് ചമയുന്നതും അതിനിടയില്‍ പറ്റുന്ന അബദ്ധങ്ങളുമാണ് ഇതിലെ പ്രതിപാദ്യവിഷയം. സാരി പരേഡും, ഡോഗ് ഷോയും എല്ലാം അവരുടെ വലിയ വിഷയങ്ങളാണ്. പരസ്പരം ഹണി എന്നു വേണം സംബോധന ചെയ്യാന്‍ എന്ന് അവര്‍ തീരുമാനിക്കുന്നു.

ആദ്യഭാഗത്തിന് എന്‍.വി.കൃഷ്ണവാര്യരും രണ്ടാം ഭാഗത്തിന് ഇ.എം.ജെ വെണ്ണിയൂരും ഒട്ടും വിരസമല്ലാത്ത ആമുഖങ്ങളെഴുതിയിട്ടുണ്ട്. രണ്ടാം ഭാഗം ആമുഖത്തില്‍ നിന്ന്-

-നമ്മുടെ ചെറുകഥകള്‍ക്ക് ശാശ്വതങ്ങളായ ചില പ്രമേയങ്ങളുണ്ട്. പ്രേമം, ദാരിദ്ര്യം,വര്‍ഗ്ഗസമരം,കുറ്റാന്വേഷണം, ത്യാഗം, വാല്‍സല്യം മുതലായവ.ഇവ ഭക്ഷിച്ചു മടുത്തു.

-ചാളകളും വേശ്യാലയങ്ങളും ഫാക്ടറികളും ആപ്പീസുകളും നമുക്ക് ചിരപരിചിതമാണ്. ഇതാ പുതിയൊരു ലോകം. കഫേകള്‍, ഷോകള്‍,പിക്‌നിക്കുകള്‍, പാര്‍ട്ടികകള്‍.നല്ല വര്‍ണ്ണപ്പകിട്ടുണ്ട്. അരമനജീവിതത്തിന്റെ അധുനാധനരൂപം. പക്ഷേ ഇവിടെ ജീവിക്കുന്നവരും മനുഷ്യരാകകൊണ്ട് അവരുടെ കഥകള്‍ക്കും മാനുഷികമായ ഒരു അര്‍ത്ഥമുണ്ട്.

-പക്ഷേ ഈ ഹണികള്‍ മനുഷ്യരാണോ? ഇക്കാര്യത്തില്‍ അഭിപ്രായവ്യത്യാസം കാണും. അദ്ധ്വാനിക്കുന്ന ജനവിഭാഗം മാത്രമേ മനുഷ്യരാകയുള്ളു എന്ന സങ്കല്‍പ്പം രാഷ്ട്രീയത്തിലെന്ന പോലെ സാഹിത്യത്തിലും നിലവിലുള്ളതുകൊണ്ട്.

തല നിറയെ എണ്ണ വാരിത്തേച്ച്, വലിച്ചുവാരി സാരിയുടുത്തിരുന്ന പഴയ പമ്പാക്കരയിലെ മറിയപ്പെണ്ണ് ഹണി മേരിയായി. ചെര്‍പ്പുളശ്ശേരിയിലെ കുഞ്ഞുപാര്‍വതിയുടെ മകള്‍ കൊച്ചുപാറുക്കുട്ടിയമ്മ  ഷീലാ നായര്‍ അഥവാ ഹണി ഷീ ആയി. പിന്നത്തേത് ഹണി കുമു അഥവാ കുമുദം. കണ്ണൂര്‍ക്കാരി റിബേക്കായാണെങ്കില്‍ ഹണി ബെക്കിയായി. പിന്നെ അവരെല്ലം കൂടി കാട്ടിക്കൂട്ടിയതെന്തെല്ലാം. വായിച്ചറിയുക, ചിരിച്ചു രസിക്കുക!

ചെര്‍പ്പുളശ്ശേരി എന്ന പേരു ഞാനാദ്യം കേട്ടത് ഈ പുസ്തകത്തിലൂടെയാണ്. അതുപോലെ ആദ്യമായി ഇതിലൂടെ പഠിച്ച മറ്റൊരു വാക്കാണ് പെഡിഗ്രി.

ഇ.എം. കോവൂരിന്റെ പുസ്തകങ്ങൾ -part I

തകഴി, കേശവദേവ്, കാരൂര്‍, ഉറൂബ് തുടങ്ങിയവരുടെ എഴുത്തിനൊപ്പം എനിക്ക് വളരെ ഇഷ്ടമുള്ള എഴുത്താണ് ശ്രീ. ഇ.എം.കോവൂരിന്റേത്. ആ ശൈലിയും പ്രയോഗങ്ങളും എല്ലാം വളരെ ഹൃദ്യമായാണ് എനിക്ക് അനുഭവപ്പെട്ടിട്ടുള്ളത്. ചിലപ്പോഴെല്ലാം ശൈലിയിലും പ്രയോഗങ്ങളിലും ഉറൂബിനോട് ഒരു സാമ്യവും തോന്നും. അതും കൂടിയാവണം ഈ പുസ്തകങ്ങള്‍ ഇത്രയും എനിക്കിഷ്ടപ്പെടാന്‍ കാരണവും എന്നു തോന്നുന്നു.

കോവൂര്‍ ഴളരെയധികം പുസ്തകങ്ങള്‍ എഴുതിയിട്ടുണ്ട്. നാലു പുസ്തകങ്ങളുണ്ട് കയ്യില്‍. ഹണിപുരാണം രണ്ടു ഭാഗങ്ങള്‍, കാട്, കൊടുമുടികള്‍, മലകള്‍ എന്നീ മൂന്ന് നോവലുകള്‍. അഭിഭാഷകന്‍, ന്യായാധിപന്‍ തുടങ്ങിയ നിലകളിലെല്ലാം കേരളസമൂഹത്തിനു ഒരു കാലത്തു ചിരിപരിചിതനായിരുന്നു കോവൂര്‍. അമ്മയെ കാണാന്‍ എന്ന സിനിമയുടെ കഥ-തിരക്കഥ അദ്ദേഹത്തിന്റേതാണ് എന്ന് നെറ്റില്‍ തിരഞ്ഞപ്പോള്‍ കിട്ടി. പക്ഷേ അദ്ദേഹത്തെ കുറിച്ച് വിക്കി പേജൊന്നും കണ്ടതുമില്ല.

മലയാളം നോവലുകളിലേക്ക് വൈവിദ്ധ്യം സന്നിവേശിപ്പിക്കാനുള്ള ശ്രമമായിരുന്നു മാതൃഭൂമി ആഴ്ച്ചപ്പതിപ്പില്‍ ഖണ്ഡശ്ശഃ പ്രസിദ്ധീകരിച്ചിരുന്ന 'ഹണിപുരാണം' എന്ന് ഗ്രന്ഥകര്‍ത്താവ്, കാട് എന്ന നോവലിന്റെ അഭിമുഖത്തില്‍ പറയുന്നുണ്ട്. കാടും മാതൃഭൂമിയില്‍ വന്നതു തന്നെ. ശരിയാണ് വായിച്ചതു നാലും വ്യത്യസ്തം തന്നെ. കാട് പ്ലാന്റേഷന്‍/റിയല്‍ എസ്റ്റേറ്റ് കഥ പറയുമ്പോള്‍, മലകള്‍ക്കു വിഷയമാകുന്നത് കിഴക്കന്‍ മലകളും അവിടെ പൊന്നു വിളയിച്ച് സമ്പത്തു കുന്നുകൂട്ടിയ കൃഷികളുമാണ്. കൊടുമുടികള്‍ വക്കീലന്മാരുടെ ലോകമാണ് വരച്ചു കാട്ടുന്നത്. ദുഷ്ടകഥാപാത്രങ്ങള്‍ എത്രയുണ്ടോ അതിനേക്കാളുണ്ട് നന്മ നിറഞ്ഞവര്‍. അത് അതിഭാവുകത്വം ഒട്ടുമേ തോന്നാതെ അവതരിപ്പിച്ചിരിക്കുന്നു. നോവലില്‍ പറയും പോലെ ഭൂമിയുടെ ഉപ്പാണ് അങ്ങനെയുള്ളവര്‍. എണ്ണത്തില്‍ കുറവെങ്കിലും ഈ ഭൂമി ഇത്രയെങ്കിലും ജീവിതയോഗ്യമാക്കി ഇപ്പോഴും നിലനിര്‍ത്തുന്നത അത്തരക്കാരാണ്-ഇത് എന്റെ വിശ്വാസം.

മലകളിലെ കറിയാ കത്തനാര്‍, ചാക്കോ അച്ചന്‍, കൊച്ചാച്ചിയമ്മ, കൊടുമുടികളിലെ ഇട്ടിച്ചാണ്ടി വക്കീല്‍, തോമസുകുട്ടി, ജേക്കബ് അച്ചന്‍, കാടിലെ അനിയന്‍കുഞ്ഞ് ഇവരെല്ലാം എത്ര മിഴിവാര്‍ന്ന കഥാപാത്രങ്ങള്‍. ഒരു കാലത്തു നമ്മുടെ നാട്ടില്‍ സുലഭമായിരുന്ന, ഇപ്പോള്‍ അന്യം വന്നു നശിച്ചു തീരാറായ ജീവികളില്‍ പെട്ടവരാണിവര്‍ .ഇവര്‍ മാത്രമല്ല ദുഷ്ടരും ശിഷ്ടരുമായ ചെറുതും വലുതുമായ ഓരോ കഥാപാത്ര സൃഷ്ടിയും മതിപ്പുളവാക്കുന്നുണ്ട്. ഇവരെല്ലാം നമുക്കു ചുറ്റും ജീവിച്ചിരുന്നവര്‍ തന്നെ എന്നങ്ങു തോന്നിപ്പിക്കുന്നു. അതല്ലേ പാത്രസൃഷ്ടിയുടെ മേന്മയും.

കോട്ടയം, തിരുവല്ല,തൊടുപുഴ, മീനച്ചില്‍ ചുറ്റുവട്ടങ്ങളിലുള്ള, സുറിയാനി കൃസ്ത്യാനികളാണ് കേന്ദ്ര കഥാപാത്രങ്ങള്‍.  അവരുടെ വിശ്വാസങ്ങള്‍, ദൈവവിശ്വാസത്തില്‍ പോലുമുള്ള പ്രായോഗികത, മണ്ണിനോടു പടവെട്ടാനുള്ള ദാഹം തുടങ്ങി എല്ലാ കാര്യങ്ങളും നര്‍മ്മം കലര്‍ത്തി വിവരിക്കുന്നുണ്ട്. ആര്‍ക്കും എളുപ്പം മനസ്സിലാവുന്ന ലളിതമായ ഭാഷയില്‍, ശൈലിയില്‍ ആണ് വിവരണം. പിന്നെ മഹാഭാരതം പോലെ കഥയില്‍ നിന്ന് ഉപകഥയിലേക്ക് നില്‍ക്കുന്ന നില്‍പ്പില്‍ അങ്ങു ചാടുന്നുണ്ട്. പക്ഷേ മടുപ്പ് ഉണ്ടാകുന്നില്ലെന്നു മാത്രമല്ല, അനുവാചകര്‍ അതു ശ്രദ്ധിച്ചെന്നു പോലും വരില്ല. സെക്‌സ്, ജാതി, മതം, സായിപ്പന്മാര്‍ തുടങ്ങി ധാരാളം കാര്യങ്ങള്‍ ഈ പുസ്തകങ്ങളില്‍ പ്രതിവാദ്യവിഷയമാകുന്നു.

സ്‌കൂള്‍ കാലത്ത് ആദ്യം വായിച്ചത് ഹണിപുരാണമായിരുന്നു. അന്നതു വായിച്ചു ചിരിച്ചു ചിരിച്ചു മണ്ണു കപ്പി. പക്ഷേ ഇപ്പോഴത്തെ വായനയില്‍ അത്രയൊന്നും ചിരിച്ചില്ല, കേട്ടോ. എന്റെ മനസ്സും പിന്നെ കാലവും വല്ലാതെ മാറിയിരിക്കുന്നു. എം.ടി പറയും പോലെ, ചിരിക്കാനുള്ള, അല്ല, നിര്‍വ്യാജം ചിരിക്കാനുള്ള സിദ്ധിയും കൈമോശം വന്നു പോയിട്ടുണ്ടാവും.

എനിക്കിഷ്ടപ്പെട്ട വരികളില്‍ നിന്ന് ചിലവ എടുത്തെഴുതുന്നുണ്ട്. വായിച്ചിട്ടു തീരുമാനിക്കാം പുസ്തകങ്ങള്‍ വായിക്കണോ വേണ്ടയോ എന്ന്.

1. മലകള്‍

1970 ലാണ് ഇത് എന്‍ബിഎസ് ആദ്യം പ്രസാധനം ചെയതത്. പിന്നെ 1979 ലും 1990ലും.

'ഉല്‍ക്കര്‍ഷേച്ഛു, ക്രൂരനും അത്യാഗ്രഹിയും ആയിരിക്കണമെന്നില്ല.സമ്പാദിക്കുന്നതില്‍ നിന്നുളവാകുന്നത്ര ആനന്ദം ദാനം ചെയ്യുന്നതിലും കാണുന്നവനാണ് യഥാര്‍ത്ഥ ശക്തന്‍..........' വില്‍ ഡ്യൂറന്റിന്റെ ഈ വാക്കുകളോടെയാണ് ഈ പുസ്തകത്തിന്റെ കുഞ്ഞി അവതാരിക തുടങ്ങുന്നത്.

കിഴക്കന്‍ മലകളും റബര്‍ കോരച്ചനുമാണ് ഇതിലെ നായകര്‍. റബര്‍ കൃഷിയെപ്പറ്റി കേട്ടറിഞ്ഞ് സായിപ്പിന്റെ തോട്ടത്തിലെ കര്‍ശന കാവല്‍ മറികടന്ന് കുരു മോഷ്ടിച്ചു സമ്പാദിച്ച് നട്ടുവളര്‍ത്തി നേട്ടം കൊയ്ത പരിശ്രമശാലിയാണ് കോരച്ചന്‍. പക്ഷേ മനസ്വിനിയായ ഭാര്യ കൊച്ചാച്ചിയമ്മയുടെ സ്‌നേഹശാസനകളെ എന്നും വകവച്ചിരുന്ന സ്‌നേഹധനന്‍.

-ഇവയെല്ലാം (വീരശൂരത്വങ്ങള്‍, രാജദൈവഭക്തികള്‍) മാത്രം കുറിക്കുവാന്‍ ബദ്ധപ്പെട്ടിരുന്ന ചരിത്രത്തിന്റെ രക്ഷാദേവതയുണ്ടോ, ഈ അജ്ഞാതരുടെ തഴമ്പും വിള്ളലും വീണ കൈകളുടെ കഥകള്‍ കുറിക്കുവാന്‍ മിനക്കെടുന്നു!അങ്ങനെ ചെയ്താല്‍ അവരുടെ ഏടുകളുടെ പരിശുദ്ധിയും കലാമൂല്യങ്ങളും നഷ്ടപ്പെട്ടു പോകില്ലേ!

-കൃസ്ത്യനിയായ തനിക്കാരാ ഉദ്യോഗം തരാന്‍.വരുന്ന മനോരമപ്പത്രത്തിന്റെ താളെല്ലാം നോക്കിക്കോ, നല്ലവണ്ണം നോക്കിക്കോ, ദിവാന്‍ജിയും പേഷ്‌കാരന്മാരും മുന്‍സിപ്പതഹസീല്‍ദാരന്മാരും  എല്ലാം എങ്ങാണ്ടത്തുകാരായ പാണ്ടിക്കാരായിരിക്കും. രായരന്മാരും അയന്മാരും അയ്യങ്കാരന്മാരുമായിരിക്കും. ബാക്കിയുള്ളതു കുറേ നായന്മാരും. കൃസ്ത്യാനികളും പൊട്ടു പിഴച്ച വല്ലവരുമുണ്ടെങ്കില്‍ തന്നെ അതു വല്ല മൂന്നാംകിട സ്ഥാനങ്ങളിലുമായിരിക്കും. ആശുപത്രി വകുപ്പ് ഇതില്‍ നിന്നു വ്യത്യസ്തമായിരുന്നു.അവിടെ ചത്തിട്ട് ആറുമേഴും ദിവസങ്ങളായ അളിഞ്ഞ ശവങ്ങളെ അറുത്തുമുറിക്കണം. പഴപപ്പും ചോരയും എടുത്തു മാറ്റണം. ഇതൊന്നും മേല്‍ജാതിക്കാര്‍ ചെയ്യില്ല. അതുകൊണ്ട് ഈ വകുപ്പില്‍ മാത്രം കുറേ കൃസ്ത്യാനികളുണ്ടായിരുന്നു. കുറേ അപ്പോത്തിക്കിരിമാര്‍. പുന്നന്‍ അപ്പോത്തിക്കിരിയും തൊമ്മപ്പോത്തിക്കിരിയും എല്ലാം.

-അപ്പോള്‍ ഉള്ളതില്‍ ഏറ്റവും നല്ലതെല്ലാം ബ്രാഫ്മണര്‍ക്ക്, പിന്നെയുള്ളത് നായന്മാര്‍ക്കാണ്...

-ചിന്തിക്കുന്നവന്‍ അതൃപ്തനാകുമല്ലോ. അതൃപ്തരില്‍ ചിലര്‍ തൃപ്തിക്കു വേണ്ടി പരിശ്രമിക്കുകയും ചെയ്യുമല്ലോ.(കോരച്ചനെ പറ്റി)

-നസ്രാണി വയ്ക്കുന്ന ചോറും കറിയും ഉന്നതവംശജരായ ഹിന്ദുക്കള്‍ കഴിക്കില്ല......എന്നാല്‍ നസ്രാണിയുടേയും വേണ്ടി വന്നാല്‍ ഈഴവന്റേയും കാപ്പിയാകാം.വെറും കാപ്പി മാത്രമല്ല പുട്ടും അടയും......

-പോരാഞ്ഞ് ചേരിക്കല്‍ ഭൂമിയല്ലേ. അടുത്തിരിക്കുന്നത് നസ്രാണി മാപ്പളേം.തമ്മില്‍ ചേര്‍ന്നാപ്പിന്നെ നനഞ്ഞ തോലും വിശന്ന നായയും പോലെയാ!വിടില്ല, ജന്മത്തു വിടില്ല.

-പണമാണല്ലോ അന്നും ഇന്നും കോട്ടയത്തേയും കുടമാളൂരേയും എണ്ണപ്പെടലിനുള്ള മാനദണ്ഡം.

-കാശിന്റെ കാര്യം വരുമ്പോള്‍ മാപ്പിളയ്ക്ക് ആങ്ങളയും അച്ചാച്ചനുമൊക്കെ രണ്ടാം സ്ഥാനത്താകും.

-കൃസ്ത്യാനികളുടെ ഭൂമിയിലുള്ള ഒരിക്കലും പതറാത്ത വശ്വാസം ഒരു ചരിത്രസത്യമാണ്.അവന്‍ സ്വര്‍ഗ്ഗത്തെപ്പറ്റിയും പറുദീസായെപ്പറ്റിയും വരാനുള്ള ലോകത്തെ കുറിച്ചുമെല്ലാം പറയും, പ്രസംഗിക്കും, പാടും, അതിനുവേണ്ടി പ്രാര്‍ത്ഥിക്കയും നോമ്പു നോല്‍ക്കയും ചെയ്യും.എന്നാലും ഈ ഭൂമിയിലും അതിന്റെ നിറവിലും അതില്‍ പണിയെടുക്കുന്നതിലും അവനു കടുത്ത വിശ്വാസവുമാണ്.

-തങ്ങള്‍ക്കുവേണ്ടി ഈ വീട്ടമ്മമാര്‍ ഒന്നും തന്നെ വാങ്ങില്ല.എല്ലാം ഇളയവര്‍ക്കും കുട്ടികള്‍ക്കും(സ്വന്തം മാത്രമല്ല) വേണ്ടി.

-അവര്‍ക്കു (സുറിയാനി കൃസ്ത്യാനികള്‍ക്ക്) വഴക്കു പിടിക്കാന്‍ ആരേയും കിട്ടിയില്ലെങ്കില്‍ അവര്‍ അവരുടെ സ്വന്തം നിഴലുകളോടു തന്നെ അങ്ങു വഴക്കു പിടിക്കുമെന്ന്!

-നമ്മുടെ വേദപുസ്തകം പോലെ തന്നെ വലിയ ഗ്രന്ഥങ്ങളാളവ. പ്രത്യേകിച്ചും രാമായണവും മഹാഭാരതവും. അതിലെ കൃഷ്ണനും രാമനും അര്‍ജ്ജുനനും ധര്‍മ്മപുത്രരുമെല്ലാം നമ്മെ അത്ഭുതപ്പെടുത്തുന്ന തരം വലിയ ആളുകളാ.ഇവയെല്ലാം വായിക്കാത്തതുകൊണ്ടും പഠിക്കാത്തതുകൊണ്ടുമുള്ള നഷ്ടം അവര്‍ക്കല്ല, നമുക്കാ....(വര്‍ക്കിയേച്ചന്‍)

-ഈ മിഷനറിമാര്‍ക്കു പോയി ആദ്യമവരുടെ സ്വന്തക്കാരെയൊന്നു നന്നാക്കിക്കൂടെ?(കുഞ്ഞോയി ദുഷ്ടരായ സായ്പന്മാരെ കുറിച്ച്)

-മാമോനും മാലാഖയും ചെകുത്താനും കൂടെ ഒന്നിച്ചു സൗഹാര്‍ദ്ദത്തില്‍ സഹകരിച്ചു കഴിയുന്ന ഏര്‍പ്പാട്(മൂന്നു തരം വെള്ളക്കാരെപ്പറ്രി)

-നമ്മുടെ നമ്പൂരിമാരിലും നായന്മാരിലുമെല്ലാം എത്ര വലിയ ആളുകളും നല്ലവരുമുണ്ടെന്ന് അവര്‍ക്കറിഞ്ഞുകൂടാ.കാരണം അവര്‍ക്ക് അവരുടെ മതവും മാര്‍ഗ്ഗവുമാണ് ശരി. രാമായണവും ഭാരതവുമെല്ലാം അവരുടെ നോട്ടത്തില്‍ അവര്‍ക്കു വായിക്കാന്‍ കൊള്ളരുതാത്ത കെട്ടുകഥകളാണ്.ക്രിസ്തായനിക്ക് വായിക്കാന്‍ കൊള്ളാത്തവയാണ്.നാലു മുഖങ്ങളും ആനയുടെ മുഖവും ദേഹത്തെല്ലാം മൂര്‍ഖന്‍പാമ്പുകളുമുള്ള അവരുടെ ദേവന്മാരും, മനുഷ്യരെ കീറിപ്പൊളിച്ച് ചോര കുടിക്കുന്ന അവരുടെ ദേവിമാരും ഈ വെള്ളക്കാര്‍ക്കു ചെകുത്താന്മാരാണ്.(മാണി റൈട്ടര്‍)

-തോക്കും വേദപുസ്തകവും കച്ചവടവും സാമ്രാജ്യത്വത്തിന്റെ ഒഴച്ചുകൂടവാന്‍ തരമില്ലാത്ത ഘടകങ്ങള്‍ തന്നെ ആയിരുന്നുവോ?

-ആയിരമായരം മനുഷ്യജീവികളുടെ രക്തവും കണ്ണുനീരും തോല്‍വി സമ്മതിക്കാത്ത ദൃഢനിശ്ചയവുമാണ് ഇന്നത്തെ ഹൈറേഞ്ചസ്.

-പെരുന്നാളുകള്‍ക്കു ഞാനെതിരാണെന്നുള്ളതാണ് !ഒന്നാമത്ത കെുറ്റം. പെരുന്നാളുകള്‍ നിര്‍ത്തിയാല്‍ പള്ളികള്‍ക്കെവിടുന്നാ വരുമാനമെന്നാ അവര്‍ ചോദിക്കുന്നത്?പുണ്യാളന്മാരോടു പ്രാര്‍ത്ഥിക്കേണ്ട ആവശ്യമില്ലെന്നു ഞാന്‍ പഠിപ്പിക്കുന്നു എന്നതാണ് വേറൊരു കുറ്റം. മറ്റൊന്നു പ്രാര്‍ത്ഥനകളും കര്‍ബ്ബാനയും നമ്മുടെ ജനത്തിനു മനസ്സിലാകുന്ന മലയാളത്തില്‍ വേണമെന്നു ഞാന്‍ പറയുന്നതാണ്.(കറിയാ കത്തനാര്‍)

-മണ്ണും പെണ്ണും ആരുമായും പങ്കു വയ്ക്കരുതെന്നാ പഴമക്കാര്‍ പറഞ്ഞിട്ടുള്ളത്(കോരച്ചന്‍)

-അയാള്‍ക്കു കാര്യം മനസ്സിലായി.അവരുടെ(കൊച്ചാച്ചിയമ്മയുടെ) നന്മയെ മറി കടന്നു പ്രവര്‍ത്തിക്കാനുള്ള ചങ്കൂറ്റവും ദുഷ്ടതയും അവരുടെ കെട്ടിയോനില്ലായിരുന്നുവെന്ന്.

-ഒരുവന്റെ മനപ്രയാസം അപ്പോഴപ്പോള്‍ മനസ്സിലാക്കുന്ന ഒരു ഭാര്യയെ കിട്ടുക.!അതില്‍ കൂടുതലൊരു മഹാനുഗ്രഹം എന്താണു ദേവം തരാനുള്ളത്?

-മനുഷ്യവര്‍ഗ്ഗത്തില്‍ത്തന്നെ ഉയര്‍ന്നവരാണല്ലോ വെള്ളക്കാര്‍. വെറും കറുത്ത തൊലിക്കാരായ നാട്ടുകാര്‍ അവരെ ഭരിച്ചു കൂടാ.ശിക്ഷിച്ചു കൂടാ.

-അസൂയ തോന്നാണ്ടിരിക്കാന്‍ അവരെന്താ മാലാഖമാരോ മറ്റോ ആണോ?ജാതിക്കുശുമ്പം കൂടെ അതിനോടു ചേര്‍ന്നപ്പോള്‍ അസൂയെ അല്‍പ്പം സാഡിസമായും മാറി.

-ആര്‍ത്തിക്കും ആവേശത്തിനുമൊരെതിരില്ലല്ലോ!കിട്ടും തോറും അവ കൂടുതല്‍ വളരുന്നു.

-സമ്പത്തിനേയും സൈന്യത്തേയും വിടാതെ പിന്തുരുക എന്നുള്ളതാണല്ലോ അഭിസാരികകളുടെ എന്നുമുള്ള തൊഴില്‍.

-മലകള്‍ പെറ്റുകിട്ടിയ ഐശ്വര്യങ്ങള്‍ പങ്കുവച്ചപ്പോള്‍ തങ്ങളുടെ വീതമായി കിട്ടിയതുകൊണ്ടു കണ്ണുമടച്ചു സുഖിക്കുവാന്‍....ഇതെല്ലാം ഒരു വശത്ത്.പളളിപ്പണിയും കുമ്പസാരവും കുര്‍ബ്ബാന കാണലും പാട്ടും പ്രാര്‍ത്ഥനയുമെല്ലാം വേറൊരു വശത്ത്. മാടന്‍ കോവിലുണ്ടാക്കലും കോഴിക്കുരുതിയും കാവടിതുള്ളലുമെല്ലാം മൂന്നാമതൊരു വശത്ത്.മുണ്ടക്കയമങ്ങനെ വളര്‍ന്നുകൊണ്ടേയിരുന്നു.

-പാമ്പു കടിക്കാനുള്ള നേരത്താ കച്ചേരി(കോടതി) കയറാനിട വരിക!

-വലിയ പഠിത്തമൊന്നുമില്ലേലും കൊച്ചാച്ചിയമ്മ പറേന്നതു മിയ്ക്കപ്പോഴും ശരിയാ. തൃപ്തിയാ മനുഷേനു വേണ്ടത്.

-പാവങ്ങളുടെ കണ്ണുനീര്‍ വീണിട്ടും വീഴ്ത്തിയിട്ടുമുള്ള വീടുകളും കുടുംബങ്ങളും ഏറെക്കാലം നിലനിന്നിട്ടില്ല.(കൊച്ചായമ്മ മകന്‍ പുന്നൂസുകുട്ടിയോട്).

-മീനും അതിഥിയും സമയത്തില്‍ കൂടുതലിരുന്നാല്‍ ചീഞ്ഞുനാറുമെന്ന് കേട്ടിട്ടില്ലേ!(കമ്യൂണി്ര്രസ് കെ.സി.വര്‍ഗ്ഗീസ് പുന്നൂസുകുട്ടിയോട്)

-എന്നാല്‍ പിന്നെ തന്റെ മക്കളായ മനുഷ്യര്‍ പല തരത്തില്‍ ജീവിക്കുന്നത് ദൈവത്തിനിഷ്ടമായിരിക്കുമോ?ഒരു കൂട്ടര്‍ ദരിദ്രരായും വേറൊരു കൂട്ടര്‍ സകല ജീവിത സൗകര്യങ്ങുമനുഭവിക്കുന്ന കുബേരനായും?(കെ.സി.വര്‍ഗ്ഗീസ്)

വേദപുസ്തകത്തില്‍ നിന്നു തന്നെ കമ്യൂണിസത്തിനനുകൂലമായ കാര്യങ്ങള്‍ കണ്ടു പിടിച്ചു മനസ്സിലാക്കിക്കുന്ന കെ.സി.വര്‍ഗ്ഗീസ് നമ്മെ ഇംപ്രസ് ചെയ്യുന്ന കഥാപാത്രമാണ്. വേദപുസ്തക quotes വിസ്തരഭയത്താല്‍ എഴുതുന്നില്ല.

-കാര്യങ്ങള്‍ സൂഷ്മമായി പഠിക്കുമ്പോള്‍ എല്ലാവര്‍ക്കുമധികാരം വേണം.ദൈവത്തിന്റെ നാമത്തിലായാലും കൊള്ളാം, സഭയുടെ നാമത്തിലായാലും കൊള്ളാം ജനത്തിന്റെ പേരിലായാലും കൊള്ളാം എല്ലാവരുടേയും എല്ലാത്തിന്റേയും ലാക്ക് ഒന്നു തന്നെയാണ്-അധകാരം. കൂടുതല്‍ അധികാരം.

ഇവരുടെ പുതുതലമുറ കുടുംബമാഹാത്മ്യം ചോദ്യം ചെയ്യുന്നതും അപ്പനപ്പൂപ്പന്മാരുടെ വഴി വിട്ട പുതു മേച്ചില്‍പ്പുറങ്ങള്‍ തേടുന്നതും വായിക്കുവാന്‍ നല്ല രസമുണ്ട്. അതേ, വാസ്തവത്തില്‍ പല തലമുറകളുടെ, സാമൂഹികമാറ്റങ്ങളുടെ ഹൃദ്യമായ ദൃക്‌സാക്ഷിവിവരണത്രേ  ഈ പുസ്തകം.


അടുത്തത്  'കൊടുമുടികള്‍'