Sunday, January 31, 2010

പാലേരി മാണിക്യം

കുറച്ചു താമസിച്ചാണെങ്കിലും കണ്ടു. മാണിക്യത്തിന്റെ തീരാക്കണ്ണീര്‍ പെയ്‌തൊഴിയാത്ത മഴ പോലെ മനസ്സില്‍ കനം തൂങ്ങി നില്‍ക്കുന്നു. ആ പാവം പെണ്‍കുട്ടിയുടെ ദുരവസ്ഥ ഒരു പെണ്ണിനും വരരുതേ ഈശ്വരാ......

ആ കഥാപാത്രം ചെയ്‌ത പെണ്‍കുട്ടിയുടെ ശാലീന മുഖശ്രീ കൊള്ളാം. മലയാളി പെണ്‍കുട്ടികള്‍ നിര്‍ബന്ധപൂര്‍വ്വം ഇല്ലാതാക്കുന്ന ആ 'മല്ലുലുക്ക്‌ ' ആകുട്ടിക്ക്‌ വേണ്ടുവോളം ഉണ്ട്‌. മലയാളിയാണോ ആവോ? ഖാലിദ്‌ ആയപ്പോള്‍ മമ്മൂട്ടി പഴയ വില്ലന്‍ ഉമ്മറെപ്പോലെ.

നല്ല ഒരു ചലച്ചിത്രകാവ്യം അണിയിച്ചൊരുക്കിയ രഞ്‌ജിത്തിനും കൂട്ടര്‍ക്കും അഭിനന്ദനങ്ങള്‍.ഇതെഴുതാനിരിക്കുമ്പോള്‍ രഞ്‌ജിത്ത്‌ 'ഉജാല ഏഷ്യാനെറ്റ്‌ 'അവാര്‍ഡ്‌ സ്വീകരിക്കുകയാണ്‌ ടി.വി യില്‍.

കമ്മ്യൂണിസ്റ്റുകളുടെ രണ്ടു മുഖങ്ങള്‍ കാട്ടിത്തരുന്നുണ്ട ്‌ ചിത്രം. കമ്മ്യൂണിസം എന്നാല്‍ നന്മയും മനുഷ്യത്യവും സ്‌നേഹവുമാണ്‌ എന്നു കരുതിയ അടിയുറച്ച പാര്‍ട്ടി വിശ്വാസി കേശവന്‍. മാര്‍ഗ്ഗം ലക്ഷ്യത്തെ സാധൂകരിക്കുന്നു എന്നു വിശ്വസിച്ച്‌ വിട്ടുവീഴ്‌ച്ചകള്‍ക്കു പ്രതിഫലമായി വര്‍ഗ്ഗശത്രുവിന്റെ സമ്പത്ത്‌ തന്നെ പാര്‍ട്ടിയിലേക്കു മുതല്‍ക്കൂട്ടുന്ന ഹംസ. പക്ഷേ ഹംസയും ഒരു പൈസ പോലും സ്വന്തമായി സമ്പാദിക്കുന്നുമില്ല. രണ്ടുപേരും ഉറച്ച പ്രവര്‍ത്തകര്‍. കേശവന്റെ രീതിയാണ്‌ ശരി എന്നാണ്‌ തോന്നിയത്‌. മാര്‍ഗ്ഗവും കൂടി നന്നായേ മതിയാകൂ.

ചില വൈകല്യങ്ങള്‍ തോന്നിയതുകൂടി പറയുന്നു, നല്ല സിനിമകള്‍ പലതും സമ്മാനിച്ച രഞ്ചിത്തിനോട്‌്‌ സ്‌നേഹപൂര്‍വ്വം. ഒന്നാമത്‌ ശ്രദ്ധയില്‍പ്പെട്ടത്‌ സ്‌ത്രീ കഥാപാത്രങ്ങളുടെ ത്രെഡ്‌ ചെയ്‌ത പുരികങ്ങളാണ്‌. രണ്ടാമത്‌ അഹമ്മദ്‌ ഹാജി(മമ്മൂട്ടി)യുടെ ഭാഷ. മുസ്ലീം വയനാടന്‍ സ്ലാങ്ങുകള്‍ തീരെ കുറവായിരുന്നു. അലിഗര്‍ യൂണിവേഴ്‌സിറ്റിയില്‍ പഠിച്ച, പണ്ഡിത പരിവേഷമുള്ള ഖാലിദി(മമ്മൂട്ടി) ന്റെ സുന്ദരഭാഷ ന്യായീകരിക്കാം. മൂന്നാമത്‌ കുമാരന്റെ പ്രായം. സമകാലികരായ ഏതാണ്ടു സമപ്രായക്കാരായ മറ്റു കഥാപാത്രങ്ങളുടെ അത്ര തോന്നിയില്ല. ഈ വക കാര്യങ്ങള്‍ കൂടി ശ്രദ്ധിക്കാമായിരുന്നു. കാലം പിന്നോട്ടോടിക്കേണ്ടി വരുമ്പോള്‍ സംഭവിച്ചുപോയ പിഴവുകളാണവ.

പിന്നെ ചെറിയ സ്‌ക്രീന്‍ മാത്രമുള്ള ,വേണ്ടത്ര സ്ലോപ്പ്‌ ഇല്ലാത്ത തിരു...ത്തെ തീയേറ്ററും അതിലെ ലൈറ്റിംഗും തീരെ മോശം.എന്തു ചെയ്യാന്‍.

ഇനിയും വരൂ രഞ്‌ജിത്‌ , പുതിയ ചലച്ചിത്രാനുഭവങ്ങള്‍ സമ്മാനിക്കുവാന്‍.....